Skip to main content
Tāhūrangi
Tāhūrangi
My Wishlist
  • Reo Māori
  • English

Te Marautanga o Aotearoa hukihuki kua tukuna kia wānangatia

28 Hānuere 2026

E tipu e rea mō ngā rā o tōu ao.
Ko tō ringa ki ngā rākau a te Pākehā hei ara mō tō tinana.
Ko tō ngākau ki ngā taonga a ō tīpuna Māori hei tikitiki mō tō māhuna.
Ko tō wairua ki tō Atua, nāna nei ngā mea katoa.

Grow up and thrive for the days destined to you.
Let your hands be on the tools of the Pākehā to provide for your body.
Let your heart be on the treasures of your Māori ancestors as a crown for your brow.
Let your soul be with your Atua, to whom all things belong.

(Tā Apirana Ngata)

I te marama o Oketopa i tukuna e mātou ngā wāhanga ako Tau 0-10 Te Reo Rangatira me te Pāngarau hei whakaako mā ngā kura auraki me ngā kura i te Wāhanga tuatahi, 2026.

Kua tukuna whānuitia te anga hukihuki o Te Marautanga o Aotearoa me ngā wāhanga ako Tau 0-10 (te Pūtaiao, te Waiora, te Toi Ihiihi, te Hangarau, Ngā Reo, me Te Reo Pākehā) kia wānangatia. Taihoa ake, ka wātea te whakahoutanga o Te Ao Māori ākuni.

E iri ana i konei hei pānui māu:

Ka kitea ngā ataata mō te marautanga e tōtōpū nei te mōhiotanga i konei. Ka whakarewa i ētahi atu ataata i konei akuni.

Te Wānanga i Te Marautanga o Aotearoa

E whai ana mātou i ngā urupare mai i ngā kaiako me ngā tumuaki mō ngā hukihukinga o ngā wāhanga ako mō ngā Tau 0-10 me te anga hukihuki o Te Marautanga o Aotearoa atu i konei tae rānō ki te Paraire, 24 o Aperira 2026.

Ka wātea hoki mō te rāngai whānui, mō ngā whānau, me ērā atu o ngā tāngata o Aotearoa nei ki te whai wāhi atu me tuku urupare mai.

Tāpiri atu ki te puka urupare ā-tuihono, kua whakaritea e Te Tāhuhu o te Mātauranga i ngā hui me ngā kauhaurangi mō ngā kura me ngā kura auraki ki te whakamōhio i a rātou ki ngā kōrero hukihuki, ā, ki te tuku urupare. Anei anō ngā kōrero whānui mō te wānanga me te arotake i konei 

Ka wātea tonu ngā kaiako ki te tono kia uru atu ki te whakamātautau ā-akomanga ā te Maehe 2026.

Kaupapa Māori

Ko te marautanga kua whakahoutia mō ngā Tau 0-10 Te Reo Rangatira, te Pāngarau, te English, me te Mathematics and Statistics (tae atu ki ngā here kei te aromatawai me te assessment) me tīmata te whakatinana mai i te tīmatanga o te 2026 i tua atu i aua kura e whakahaeretia ana e te poari kura motuhake.

Ko ngā kura e whakahaeretia ana e tētahi poari kura motuhake hei te tīmatanga o 2027 whakatinana ai. Ko te whakamārama o te poari kura motuhake e kī ana ko te poari ko tētahi o ngā whakamārama e whai ake nei:

  • he kura kaupapa Māori 
  • he kura motuhake whai tūāpapa hapū-, tūāpapa iwi-rānei, he whakapapa atu ki Ngā Kura ā Iwi o Aotearoa rānei
  • he kura tūmatanui whai tūāpapa hapū, tūāpapa iwi-rānei.

Ko te wā whakawhiti mō ngā poari kura motuhake kia whai wāhi ai te Karauna ki te mahi ngātahi me ngā ratonga mātauranga Kaupapa Māori mā ō rātou māngai i mua mai i te pānga o ēnei whakataunga ki runga i tō rātou kura.

Ko te tikanga o tēnei ko ngā kura e whakahaeretia ana e te poari kura motuhake ka wātea ki te whakaako tonu i te marautanga onāianei (i.e. tērā e whakaakohia ana i te 2025), ā, ka wātea hoki ki te whakamahi i te assessment, te aromatawai me ngā tikanga pūrongo onāianei. Ka wātea rātou ki te whakaako i te marautanga kua whakahoutia me ngā taputapu hou ā te 2026 ina hiahiatia.

Tau 11-13

Ko ngā kaupapa ako Tau 11-13 hukihuki hou ka wātea hoki ā te Wāhanga tuatahi, te 2026. Ka tono mātou ki te motu whānui mō ngā urupare me te āwhina kia waia, kia rite mō ēnei hoki. Kāore he here kia whakaakohia kia tae ki te 2028 (mō ngā kōrero Tau 11), te 2029 (mō ngā kōrero Tau 12), me te 2030 (mō ngā kōrero Tau 13). 

E whakahau ana mātou i ngā kura me ngā kura auraki kia tīmata rātou ki te whakaako i te marautanga Tau 9 katoa ā te 2026 ina koinei te rangapū tuatahi ki te whai i ngā kaupapa ako hou Tau 11-13 mai i te 2028. E whakaarotau ana mātou ki te tuku i ngā rauemi tautoko mō ngā kōrero Tau 9 mō ngā wāhanga ako, ka mutu, ka wātea ēnei ā kō ake nei.

Ngā rauemi me ngā tautoko

E waihangatia ana e mātou i te maha o ngā momo taputapu me ngā rauemi hei tautoko i a koe, tae atu ki ngā aratohu tere me ngā rauemi tautoko kaiako. Ko ngā arawātea mō ngā Akoranga me ngā Whanaketanga Ngaio (PLD) tae atu ki ngā PLD kaupapa ako-motuhake me te PLD whakahou tira whakahaere ka wātea anō hoki me ngā rauemi tāpiri mō ngā kaiako o ngā mokopuna i te Tau 9. Kei ēnei rauemi ko ngā mahere ā-tau me ngā puna rauemi mō te whakaako (e mau nei i ngā mahere kōwae ako me ērā atu o ngā mahere whakaako): Te tautoko i a koe ki te tuku i te Marautanga ā-Motu kua whakahoutia.

Pātai

Mehemea he pātai āu, tēnā tuku īmera mai ki a: [email protected].