Te tirohanga weteoro ā-motu tuatahi kua wātea hei whakamahi
4 Huitanguru, 2025
Mō te wā tuatahi kua wātea mai tētahi taputapu ōrite mā ngā kaiako Tau 1 katoa hei āta tirotiro i te kokenga o te pānui a ngā tamariki.
Ka āwhina ngā tirohanga weteoro hou i ngā kaiako kia mārama ai rātou ki te kokenga o ngā tamariki e pā ana ki te marautanga Ingarihi kua whakahoutia, kia tōtika ake ai te whakarite mahere mō ngā mahi whai ake o ā rātou akoranga.
Kei te mōhio hoki tātou kei te rikarika ngā tamariki tau tuatahi ki te ako me te hiahia hoki kia eke rātou i roto i ngā mea katoa e whai wāhi atu ana rātou. Mā ngā tirohanga weteoro ka taea te whakanui tō rātou kokenga, tutukitanga hoki me te tautuhi i ngā tautoko whakatere akoranga ka hiahiatia pea hei āwhina i te kokenga me te tutukitanga tika o ngā tamariki.
I te taumata ā-motu, ko tā ngā tirohanga, mō te wā tuatahi he whakaatu tika he pēhea te tau o ngā tamariki ki te kura kia mārama katoa ai tātou ki te āhua o te manaaki a te pūnaha mātauranga i ngā ākonga nohinohi.
Kua whakaū te whakamātautau i te tōtika o te tirohanga weteoro
I tērā tau i whakamātauria e mātou ngā tirohanga i ngā kura 76 puta noa i te motu, i reira ka whakaatu ngā kaiako he pēhea te whaitake o ngā aromatawai mō te ārahi i ngā tohutohu me te tautuhi i ngā āputa o ngā akoranga o ngā ākonga.
2,250 ngā tamariki i tirohia, i te 20 wiki, i te 40 wiki rānei i muri i te tīmatanga i te kura.
I kitea e te whakamātautau he whaitake ngā tirohanga weteoro mō te tātari i ngā mōhio me ngā pūkenga weteoro. I kite ngā kaiako he whaikiko ngā tirohanga weteoro mō te tautuhi i ngā āputa akoranga ākonga me te ārahi i ngā mahi whai ake me te hiahia hoki noho koinei te paerewa ōrite e mārama ai ngā kura ki ngā whakaakoranga me ngā akoranga weteoro.
Pānuitia te whakarāpopototanga o te whakamātautau i konei:
Phonics check - summary report on trial results (Tāhūrangi)
He aha kei roto i te tirohanga
He mea hanga ngā aromatawai poto, māmā kia mahia i te wiki 20 me te 40 o te kura (me kī e rua ngā wāhanga kura, e whā ngā wāhanga kura hoki). E tautoko ana ngā tirohanga i tētahi aronga rangaranga reo ā-tā kia uru pai atu ai ki ngā mahi e mahia ana e ngā kaiako me te marautanga Ingarihi kua whakahoutia.
Ā-kaiako nei, ka noho koe me te tamaiti ki te whakamātautau i ngā kupu tūturu me te hanganoa ka pānuitia e ia.
Kia tino māmā ai te whakamahi, ka taea te mahi matihiko, i runga pepa rānei.
He aha te kiko o ngā tirohanga
Ina mahia matihikotia, ka puta wawe tonu mai he māka tapeke tae atu ki ngā pūrongo ākonga takitahi hei tautoko i ā rātou whakarite mahere me ngā tikanga mahi ngaio.
Ka taea e ngā kura te tukuatu ngā otinga ki te tomokanga raraunga haumaru a te Tāhuhu e puta ai tētahi pūrongo kura e whakamārama ana i te kokenga, te tutukitanga, me te tātaritanga hangapori. Ka kirimunatia hoki e te Tāhuhu me te whakahiato i ngā raraunga ki te aroturuki i te whaitake o te tautoko a te pūnaha i te reo matatini pūhou.
Ki hea tiki i ngā rauemi me ngā tohutohu tirohanga weteoro
Ko ngā mea katoa me mōhio ngā kaiako kia tīmata ai rātou me te whakatinana i ngā tirohanga kei konei kei Tāhūrangi, tae atu ki ngā tūmomo tautoko katoa mō te whakatinana:
Phonics Checks – guidance for schools (Tāhūrangi)
Ka tū ngā kauhau tuihono ā te 14, 17 me te 18 o Huitanguru hei tuku whakamāramatanga whānui mō ngā mea katoa me mōhio ngā kaiako mō ngā tirohanga weteoro me te whakautuutu pātai hoki. Ka taea ērā te toro atu mā te whārangi weteoro i runga ake.
Me whakapā atu hoki ki tō tari ā-rohe a te Tāhuhu, mō ngā tautoko ā-kanohi mai i Ngā Kaitohutohu Marautanga me te whakautu hoki i ētahi atu pātai āu.
Hihira Weteoro
Kua āta hangaia tētahi tirohanga weteoro mā te hunga e ako ana i roto i te reo Māori. Kei konei ngā mōhiohio mō tērā:
Hihira Weteoro – he aratohu mā ngā kaiako