Ka whakatakoto te Minita i ana takunetanga mō te aromatawai
3 o Hōngongoi 2024
Kua whakatakoto te Minita o ngā Take Mātauranga i ana takunetanga mō te waihanga mai i tētahi pūnaha aromatawai e ōrite ana te karawhiu, e arorau ana hoki, arā, ko tētahi ka whakamahia puta noa i ngā tau katoa o te ākonga i te kura.
Ka putuputu te whakatakinga o ōna wāhanga, ā, i te wāhanga tuatahi, kua whakaūria e te Minita:
-
Te whakatakinga o ngā pae hihira oromotu mō ngā ākonga i tana tau tuatahi i te kura i te 20 wiki, i te 40 wiki anō hoki.
Ka arotahi tēnei pae hihira ki ngā āhuatanga me mātua mau i te ākonga e māia ai ia hei kaipānui, ka tautohu hoki i ngā ākonga me whai tautoko. E rua ngā pae hihira oromotu ka tukua - ko tētahi ki te reo Pākehā me tētahi ki te reo Māori. Ka whakamātauria ngā pae hihira ā te Wāhanga 4 o 2024, ka mutu, ka wātea mai ngā pae hihira oromotu ki ngā kura ā te upoko o te Wāhanga 1 o 2025.
-
Te whakawhiti haere a ngā kura ki te whakamahi i tētahi o ngā taputapu aromatawai e toru kia rua ai ngā aroturukinga o te ako haere a ngā ākonga Tau 3 - 8 i ia tau.
Ka rua ngā aromatawai i ngā Tau 3 – 8 i ia tau hei aroturuki i tā rātou ako haere i te pānui, i te tuhituhi, i te pāngarau hoki. E toru ngā taputapu ka wātea mai, ā, e whakahau ana mātou i ngā kura kia tīmataria mai tā rātou whakamahi i te taputapu e pīrangitia ana e rātou atu i te tau 2024. I tōna tikanga, ka whakamahia ngā aromatawai i ngā kura katoa ā te 2026. Anei aua rauemi:
- e-asTTle: mō The New Zealand Curriculum me Te Marautanga o Aotearoa.
- Progressive Achievement Tests (PAT): mō The New Zealand Curriculum.
- Te Waharoa Ararau (TWA): mō Te Marautanga o Aotearoa.
-
Te whakawhānuitanga o te rangahau o te Curriculum Insights and Progress
Ka whakawhānuitia te rangahau o te Curriculum Insights and Progress kia aromatawaihia ai te reading, te writing, te maths hoki i ia tau mō ngā Tau 3, mō ngā Tau 6, mō ngā Tau 8 hoki. E whai whakaaro ana mātou ki ētahi kōwhiringa mō te hunga e ako ana mā roto mai i te reo Māori e tū mai ai tētahi rangahau aroturuki e ōrite ana.
E rere ana ētahi mahi kia mārama ai ki ētahi atu ara wātea, kia kitea ai hoki te whānuitanga o aua ara wātea mō te aromatawai i ētahi pae akoako matua, kia waihangahia tētahi ara e ōrite ana te karawhiu, e arorau ana hoki puta noa i te pūnaha mātauranga whānui. Ka wātea mai ētahi kupu aratohu me ētahi whakangungu hei āwhina kia whakatinanahia tēnei panonitanga. Ko te ōrite o te karawhiu i te aroturukihanga o te ako haere a te ākonga tētahi o ā mātou take mātauranga mātāmua e ono, e waihangahia nei ngā take mātāmua katoa e tutuki ai ki tā mātou whāinga kia 80 ōrau ngā ākonga Tau 8 ka eke ki te taumata e tika ana, ki tua atu rānei, o te marautanga mō tōna pakeketanga i te pānui, i te tuhituhi, i te pāngarau hoki i mua i te Tīhema o 2030.
Pānuitia te whakapāohotanga a te Minita: Govt delivers consistency for assessing Kiwi kids | Beehive.govt.nz